2023 жылдың І жартыжылдығының қорытындысы бойынша әлеуметтік-еңбек саласындағы мемлекеттік қызметтерді оңтайландыру мен проактивті форматқа ауыстырудың нәтижесінде мемлекеттік бюджеттен 114 млн теңгеден астам сома үнемделді, деп хабарлайды ҚР Еңбек және халықты әлеуметтік қорғау министрлігі.
Мұндай нәтижеге құжаттарға қол қоюшыларды қысқарту және кейбір қызметкерлерді мемлекеттік қызмет көрсету процесінен шығару арқылы қол жеткізілді. Бұл жұмысты ведомство қызмет көрсету процестерін трансформациялау және реинжиниринг шеңберінде өткізді.
2022 жылдың соңынан бастап 2023 жылдың басына дейін 3 мемлекеттік қызмет автоматтандырылды: «Алтын алқа», «Күміс алқа» алқаларымен наградталған немесе бұрын «Батыр ана» атағын алған, I және II дәрежелі «Ана даңқы» ордендерімен наградталған көпбалалы аналарға мемлекеттік жәрдемақы тағайындау, мүгедектігі бойынша мемлекеттік әлеуметтік жәрдемақы тағайындау және жерлеуге біржолғы төлем тағайындау.
Аталған қызметтерде адам факторы толығымен алынып, автоматты түрде тағайындала басталды.
Осылайша, қызмет алушыларға проактивті форматта қызметті алу мүмкіндігі туралы SMS-хабарлама жіберіліп, оған жауап алған кезде ақпараттық жүйе адамның қатысуынсыз шамамен 1 күн ішінде жәрдемақы тағайындау туралы шешім қабылдайды.
Бұрын жәрдемақы тағайындау туралы шешім қабылдауға 7 адам қатысып, үрдіс 8 жұмыс күніне дейін созылатын.
Сонымен қатар бала тууға және бала күтіміне арналған жәрдемақы, жүктілікке және босануға байланысты табысынан айырылған жағдайда берілетін әлеуметтік төлем, сондай-ақ бала бір жарым жасқа толғаннан кейін оның күтіміне байланысты табысынан айырылған жағдайда тағайындалатын әлеуметтік төлем бойынша өтініштерді қарау тәртібі жеңілдетілді.
Оңтайландыру аясында «Азаматтарға арналған үкімет» мемлекеттік корпорациясы» КЕАҚ мамандарының осы процеске қатысуы алынып тасталып, бұл қызмет көрсету мерзімі 8 күннен 4 жұмыс күніне дейін қысқартылды.
2023 жылдың соңына дейін осындай тәртіппен көрсетілетін қызметтердің тағы 4 түрі бойынша өтініштерді қарау мерзімін қысқарту жоспарлануда. Атап айтқанда, көпбалалы отбасына жәрдемақы тағайындау; еңбек ету қабілетінен айырылған жағдайдағы әлеуметтік төлем; асыраушысынан айырылған жағдайдағы әлеуметтік төлем; бірінші, екінші және үшінші топтағы мүгедектігі бар адамдарға арнаулы мемлекеттік жәрдемақы.
Вам может быть интересно: «Гуманитарные организации доставили 35 тысяч тонн помощи в охваченном конфликтом Судане - ООН»
