ҚР Электрондық еңбек биржасында (ЭЕБ) 2023 жылғы шілдеде жұмыс берушілерден 98 мың бос жұмыс орны және өтініш берушілерден 93,4 мың түйіндеме жарияланды. Өткен аймен салыстырғанда бос жұмыс орындарының саны 9%, ал түйіндемелердің саны бірден 71,4% артты, деп хабарлайды ranking.kz.
Орналастырылған түйіндемелердің санының күрт артуы сұраныс пен ұсыныс арасындағы, әсіресе өңірлердегі елеулі теңгерімсіздікті тудырды, деп хабарлайды ЕХӘҚМ. Мәселен, 2023 жылдың шілде айында Шымкентте 2,7 мың бос жұмыс орны орналастырылса, түйіндеме — 7,2 мың, Маңғыстау облысында — 6,2 мың түйіндеме 2,2 мың бос жұмыс орны, Қызылорда облысында — 2,3 мың бос жұмыс орнын 5,9 мың түйіндеме болған.
Биыл шілде айында жұмыс берушілер тарапынан ең жоғары сұраныс негізгі және жалпы білім беру (7 мың бос орын) және ауыл шаруашылығы (6,1 мың бос орын) салаларында байқалды. Жұмыс берушілер ең жоғары жалақыны инженер-гидрологтарға (орта есеппен 800 мың теңгеден), одан кейін бағдарламалық қамтамасыз ету сәулетшілеріне (орта есеппен 750 мың теңгеден) және өнеркәсіптегі бөлім басшыларына (орта есеппен 696 мың теңгеден) ұсынды.
Өтініш берушілер арасында ең жоғары сұралатын жалақыны көбінесе локомотив машинистері (орта есеппен 1,7 млн теңгеден), одан кейін коммерциялық кәсіпорындардың директорлары (орта есеппен 1,6 млн теңгеден) және тау-кен инженерлері (орта есеппен 900 мың теңгеден) арасында байқалады.
Жалпы, 2023 жылдың бірінші жартыжылдығында ЭЕБ-та 330,7 мың үміткер тіркелген. Олардың ең көбі Түркістан облысынан (76,3 мың), Қызылорда (28,3 мың) және Жамбыл (23,1 мың) облыстарынан, ең азы — Ұлытау (3,3 мың), Ақмола (5,3 мың) және Солтүстік Қазақстан (6,5 мың) облыстарынан.
2023 жылдың қаңтар–маусым айларында ЭЕБ арқылы 100,1 мың жұмыс іздеуші жұмысқа орналастырылды, бұл осы биржа арқылы тіркелген барлық жұмыс іздеушілердің 30,3%-ы. ҚР өңірлері арасында ЭЕБ арқылы ең көп жұмыспен қамтылғандар Түркістан облысында (28,6 мың), одан кейін Қызылорда облысында (13,6 мың) және Алматыда (9,9 мың). Бұл ретте жұмыспен қамтылғандардың ең көп үлесі Қызылорда облысында (47,9%), одан кейін Алматыда (45,4%) және Солтүстік Қазақстан облысында (43,7%) байқалды. ЭЕБ арқылы ең аз жұмыспен қамтылған Шымкент қаласы болды: 592 жұмыс іздеуші, бұл тіркелгендердің 4,2%-ы ғана.
