Сафи Өтебаев атындағы Атырау мұнай және газ университетінің студенттері Румыниядағы Rompetrol зауытында өндірістік тәжірибеден өту мүмкіндігіне ие болды.
Rompetrol бренді сауда мен мұнай өңдеуден бастап жанармай құю станцияларында Еуро 5 мұнай өнімдерін сатуға дейінгі энергия көзін қамтиды.
АтМГУ шетелдік компаниялармен тиімді әріптестік қарым-қатынасты нығайтып келеді. Соның бірі - мұнай-газ саласындағы ірі бренд, 40 жылдық тарихы бар Rompetrol компаниясы. Молдова, Болгария, Грузия, Франция мен Испания нарығындағы бірден-бір румыниялық бренд ретінде де белгілі.
С. Өтебаев атындағы АтМГУ студенттерді тәжірибеге бағытталған оқытумен 100% қамтиды. Румынияға сапар алдында студенттерді университет ректоры Гүлзада Шакуликова қабылдап, Rompetrol зауытында тағылымдамадан өту студенттерге халықаралық ортаға енуге, білімдері мен дағдыларын дамытуға мүмкіндік беретінін атап өтті.
Білімнің жаңа көкжиегін игеруге талпынған студенттерімізге сәтті сапар тілейміз.
