Елімізге инвестиция тартудың басым бағытының бірі - денсаулық сақтау саласы. Осы мақсатта Францияға облыстық денсаулық сақтау басқармасының басшысы Ләззат Ранова және Ұлытау облысы әкімінің Денсаулық сақтау мәселелері жөніндегі кеңесшісі Азель Рамазанова барған болатын.
Ал бүгін Ұлытау облысына Франция даму агенттігінің (AFD) делегациясы келді. Агенттік өкілдерімен болған кездесуге облыс әкімі Берік Әбдіғалиұлы, бейінді мекемелердің басшылары мен мамандары қатысты.
Жиын барысында облыстың денсаулық сақтау жүйесіндегі қазіргі ахуал, оның басым даму бағыттары, жобалары, сондай - ақ инфрақұрылым мен материалдық-техникалық жарақтандыруды дамыту бойынша облыстың қажеттіліктері ұсынылды.
Облыс әкімімен кездесуден кейін делегация өңірдің медицина мекемелеріне, яғни, облыстық көпсалалы ауруханаға және «Жезқазған» медициналық орталығына арнайы барды. Онда медициналық ұйымдардың қызметіне қатысты мәселелер, сондай-ақ медициналық мекемелерді қаржыландыру тетіктері, кадрлармен қамтамасыз ету, МӘМС жайы талқыланды. Сондай-ақ инфрақұрылымдық жобалардың болашағы, өңірдің денсаулық сақтау жүйесінің ерекшеліктері туралы да айтылды.
Сапар қорытындысы бойынша, агенттік өкілдері Ұлытау облысындағы өзекті мәселелерді талқылауды күн тәртібіне енгізуге ниетті екендерін жеткізді.
Вам может быть интересно: «Минобороны США заявило о сбитом в Сирии беспилотнике союзника по НАТО Турции»
