Қазақстандықтар соттан тыс банкроттық туралы 67 мыңнан астам арыз, сотқа банкроттық туралы 1 мыңнан астам талап арыз берді. Банкроттық туралы өтініштердің басым бөлігін Түркістан және Алматы облыстарының тұрғындары берген. Бұл туралы ҚР Қаржы министрлігі «Ақпараттық-есептеу орталығы» АҚ баспасөз қызметі хабарлайды.
Белгілі болғандай, 2023 жылдың наурыз айында президент тапсырмасы бойынша жеке тұлғаларды банкрот деп тану туралы өтініштерді қабылдау басталды. Бұл ретте, қыркүйек айының соңында, яғни механизм жұмыс істеген 7 ай ішінде 3 768 өтініш беруші банкрот деп танылды.
“Соттан тыс банкроттық рәсімі де, соттағы банкроттық та - өте ұзақ рәсімдер. Арыз беруден мемлекеттік органдардың немесе соттардың шешіміне дейін банкроттықты тану процесі 6 ай немесе одан да көп уақытқа созылуы мүмкін. Бірінші жағдайда, рәсім банктерге, микроқаржы ұйымдарына және инкассаторларға 1600 АЕК-тен аспайтын берешегі бар, яғни 5,5 млн теңгені құрайтын, берешегін бір жылдан астам уақыт өтемеген және мүлкі жоқ борышкерлерге арналған. Бір жылдан астам төлем жасалмаған, қарыз сомасы 5,5 млн теңгеден асатын қарыздың барлық түрлері бойынша борышкер сотта банкрот деп танылуы мүмкін. Екі механизм үшін де қарыз алушы мен несие берушінің бұрын келісімге келуге тырысуы маңызды, мысалы, егер борышкер өсімпұлды есептеуді тоқтата тұру туралы өтініш берсе”,- делінген хабарламада.
Егер қарыз алушының жалғыз баспанасы кепілге қойылса, несие беруші оны алып қоюға және оның алдындағы қарыздарын жабу үшін сатуға құқылы екені атап өтілген. Жалғыз баспана кепілге қойылмаса, несие беруші оны талап ете алмайды.
Өтінім «E-Gov.kz» электронды үкімет порталы немесе «E-SALYQ AZAMAT» мобильді қосымшасы арқылы қабылданады. Өтінімдерді өңдеу, өтініш берушілерге балл қою (тексеру) мемлекеттік деректер базасы арқылы тікелей жұмысты Qoldau.kz мемлекеттік цифрлық платформасында орналасқан «Таzalau» электронды сервисі жүзеге асырады.
Вам может быть интересно: «ЕҰУ-да ғылымнан түскен табыс үш есе өсті»
