Бүгін Қазақстан Республикасы Парламентінің Сенаты Бас прокуратура әзірлеген Қазақстан Республикасы мен Кипр Республикасы арасындағы Ұстап беру және Қылмыстық істер бойынша құқықтық көмек көрсету туралы келісім-шарттарды ратификациялады.
Келісім-шарттарға 2022 жылдың 20 қазанында Никосияда қол қойылған болатын.
Ұстап беру туралы келісім-шарт іздеуде жүрген адамдарды қылмыстық жауапкершілікке тарту немесе сот үкімін орындау үшін ұстап беруді реттейді.
Қылмыстық істер бойынша құқықтық көмек көрсету туралы келісімде қылмыс жасағаны үшін күдіктілер мен айыпталушылардың кінәсін дәлелдеуге бағытталған процессуалдық әрекеттер қарастырылған.
Жалпы, соңғы үш жылда Бас прокуратура шет мемлекеттерден іздеуде жүрген 116 күдіктіні немесе қылмыскерді елге қайтарып, шет мемлекеттерге 260 адамды экстрадициялаған.
Қазақстандық құқық қорғау органдары шетелдік серіктестердің 550 халықаралық тергеу тапсырмасын жүзеге асырса, шет мемлекеттердің құзырлы органдары қазақстандық тараптың 600-ден астам сұранысын орындаған.
Бұл саладағы халықаралық-құқықтық ынтымақтастықты кеңейту жұмысы Бас прокуратура басшылығының ерекше бақылауында.
