15-16 қараша күндері 19-шы рет ұйымдастырылып отырған Kaztraffic-2023 көрмесі аясында Қазақстан жол ғылыми-зерттеу институты Көлік министрлігінің қолдауымен «Инновациялар мен инфрақұрылымның қиылысы: жол саласын дамыту формуласы» тақырыбында халықаралық ғылыми-практикалық конференция өткізеді.
Пленарлық сессияда көлік вице-министрі Сатжан Аблалиев, автомобиль жолдары комитетінің төрағасы Төлеген Абдуллин және PIARC Дүниежүзілік жол қауымдастығының бас хатшысы Патрик Маллежак сөз сөйлейді.
Сондай-ақ поляк жол конгресінің президенті Збигнев Котларек, JSTI GROUP бас инженері, профессор Цао Жунцзи, Берклидегі Калифорния университетінің жетекші сейсмологы Шахзод Тахиров және China Shandong International Economic & Technical Cooperation Group LTD компаниясының ғылыми-зерттеу және тәжірибелік-конструкторлық жұмыстар жөніндегі директоры Вейлин Ву баяндама жасайды.
Сонымен қатар талқылауға Қазақстан, Германия, Франция, Украина, Өзбекстан, Моңғолия, Ресей және Беларусь елдерінің сарапшылары қатысады деп жоспарланып отыр.
Конференцияда «Қазақстан Республикасының автожол саласын дамытудағы PIARC рөлі», «Экологиялық және ұзақ мерзімді көлік инфрақұрылымын салуға арналған ХХІ ғасырдағы нанотехнологиялар», «Инфрақұрылымның сенімділігі мен беріктігін қамтамасыз ету үшін құрылымдық мониторингтің, тестілеудің және сандық модельдеудің заманауи технологиялары», «Жолдағы ақылды технологиялар және апатты жағдайларды жою», «Пластмассаларды асфальтбетондардың беріктігін арттыру үшін полимерлі қоспалар ретінде қолдану» сындытақырыптар талқыланатын болады.
Халықаралық конференцияда қаралатын тақырыптардың еліміз үшін маңызды екенін атап өткен жөн. Өйткені еліміздің көлік-логистикалық әлеуетін арттыружәне автомобиль жолдарын дамыту күн тәртібіндегі маңызды сұрақтардың бірі болып табылады. Аталған іс-шара шетелдік және отандық ғалымдардың, сарапшылардың, жолшылардың, мемлекеттік органдар мен кәсіпкерлік қоғамдастықтың пікір алмасу алаңына айналмақ.
Естеріңізге сала кетейік, биылдан бастап Қазақстан PIARC ұйымының құрамына кірді. Тиісті келісімге Прагадағы XXVII Дүниежүзілік жол конгресінде қол қойылған болатын. PIARC-ке мүшелік ету халықаралық сарапшылардың қатысуымен әзірленіп жатқан инженерлік құрылыстар мен жол қозғалысына қатысты заманауи техникалық әзірлемелерге және салалық құжаттамаға қол жеткізуге мүмкіндік береді.
