Биыл «2021–2025 жылдарға арналған кәсіпкерлікті дамыту» жөніндегі Ұлттық жоба аясында 25 мың адам әртүрлі жұмыспен қамтудың белсенді шараларына жолданды. Одан бөлек 15 мыңға жуық жаңа жұмыс орындары құрылды. Жалпы құрылған жұмыс орындарының 80%-ы ауылдық жерлерде екенін айта кеткен жөн. ОКҚ алаңында өткен баспасөз конференциясында Батыс Қазақстан облысының әкімі Нариман Төреғалиев осындай көрсеткіштерді жария етті.
Сондай-ақ, биыл 25 мың отбасыға 2 млрд астам теңгеге әртүрлі әлеуметтік көмек көрсетіліп, нәтижесінде атаулы әлеуметтік көмек алушы отбасылар саны 28%-ға азайды.
«Орал қаласында заманауи стандарттар мен технологияларға сәйкес мүгедектігі бар адамдарға арналған 7,5 млрд теңгеге 150 орындық әлеуметтік оңалту орталығының құрылысы жүргізіліп жатыр. «Жасыл Ел» жобасы аясында 1200 жас жұмыспен қамтылды. Биыл «Дипломмен ауылға» бағдарламасы бойынша 540 жас маман 186 млн теңге көлемінде бастапқы көтерме ақы алса, келесі жылы «Жайық жастары» баспана бағдарламасы аясында 600 млн теңгеге 40 жас отбасыға арналған жобаны іске асыру көзделіп отыр», - деді өңір әкімі.
БҚО әкімі Нариман Төреғалиев Орталық коммуникациялар қызметі алаңында «Батыс Қазақстан облысының әлеуметтік-экономикалық дамуы туралы» тақырыбында өтетін баспасөз мәслихатына қатысады.
09 қараша 2023
