Биыл қарашаның соңында жаңа пәтерлер бір жылда 3,2% қымбаттады. Бұл ретте қайталама нарықтағы жылжымайтын мүліктің құны, керісінше, 5,4% төмендеді. Ал абаттандырылған тұрғын үйді жалға алуға келетін болсақ, ол 0,9% арзандады, деп хабарлайды finprom.kz
Салыстыру үшін: осы кезеңде инфляция 10,3%-ды құрады, азық-түлік тауарлары 9,2%, азық-түлік емес тауарлар 9,9%, ақылы қызметтер 12% қымбаттады.
Елдің ірі қалаларының ішінде жаңа тұрғын үй бағасы Павлодарда айтарлықтай өсті: бір жылда 14,8%. Бағаның айтарлықтай өсуі Петропавл (10,6%) және Ақтау (10%) қалаларында байқалды. Қарағандыда баға былтырғы деңгейде қалды. Шымкентте және Көкшетауда баға төмендеді: тиісінше 4,3% және 6,3%.
Қайталама нарық Атырауда (бір жылда 11,8%), Семейде (8,3%) және Қызылордада (7,8%) қымбаттады. Өскеменде баға өзгерген жоқ. Қарағанды, Орал, Алматы, Ақтау, Қонаев және Астана сияқты қалаларда қайталама нарықтағы баспана арзандады.
Жалдау ақысы ең көп Жезқазған, Қарағанды және Көкшетауда қымбаттады. Павлодарда баға былтырғы деңгейде сақталды, Түркістан мен Алматыда төмендеді.
Биыл қарашада ҚР-да жаңа тұрғын үйлердің орташа құны шаршы метріне 492 мың теңгені құрады. Бұл ретте қайталама нарық біршама қымбаттады: шаршы метрі 493,6 мың теңге. Абаттандырылған тұрғын үйдің бір шаршы метрін жалдау ақысы 4,8 мың теңге.
Жаңа пәтерлер ең қымбат Астанада, ең арзаны Жезқазғанда. Қайталама нарықтағы пәтерлер ең қымбат Алматыда, ең арзаны — Көкшетауда. Жалдау ақысы ең қымбат Алматыда, ең арзаны Таразда.
Биыл 11 желтоқсанындағы жағдай бойынша, Numbeo мәліметінше, Қазақстандағы қала орталығындағы пәтердің құны шаршы метріне 1,4 мың АҚШ доллары. Бұл рейтингке қатысушы ТМД елдері арасындағы ең төменгі көрсеткіштердің бірі.
Жалпы, ТМД елдерінде тұрғын үй бағасы ең жоғары Арменияда, ең төменгісі Өзбекстанда.
Бұл ретте, ҚР-дағы қала орталығында орналасқан бір бөлмелі пәтерді жалға алу құны 576,1 АҚШ доллары. Мұндағы баға, керісінше, ең жоғары бағалардың бірі: Қазақстан құны бойынша Армениядан кейін екінші орында. Жалдау ең арзан Беларусьте — 308,6 АҚШ доллары.
Биыл жылжымайтын мүлік нарығының мамандары Қазақстан қалаларында тұрғын үй бағасының арзандағаны туралы көп айтады, бірақ іс жүзінде пәтерлер мен үйлер барлық жерде арзандаған жоқ, деп хабарлайды zakon.kz. Сатып алу-сату мәмілелерінің саны 30% азайды. Сарапшылар мен нарыққа қатысушылардың көбі тоқырау бар дейді.
