Алматы облысы бойынша Сыбайлас жемқорлыққа қарсы қызмет жемқорлықтың себептері мен жағдайларын анықтау үшін өңірдегі спорт саласын тексереді.
Ведомство мәліметінше, алдымен ең көп қаржы бөлінген спорт саласындағы жемқорлық тәуекелдеріне сыртқы талдау жүргізіледі. Тексеру нысанына облыстық Дене шынықтыру және спорт басқармасы, әрі оған қарайтын ұйымдар ілініп отыр.
«Бұдан бөлек, спорттық іс-шараларды, жиындарды, жабдықтарды, спорттық тамақтануды сатып алуды, оқу-жаттығу жиындарын ұйымдастыруды қамтамасыз ететін бюджеттік және бюджеттен тыс көздер зерделенетін болады. Талдау департаменттің, мүдделі мемлекеттік органдардың қызметкерлерімен және азаматтық қоғам өкілдерімен жүргізіледі», – деп хабарлады Сыбайлас жемқорлыққа қарсы қызметінен.
Сонымен қатар, Антикор өкілдері азаматтарды Сыбайлас жемқорлықты анықтауға қатысуға шақырды.
«Егер Сізде жемқорлық тәуекелдері туралы ақпарат болса немесе спортты қаржыландыру саласын жетілдіру бойынша ұсыныстарыңыз болса, оларды [email protected] электрондық поштасына жіберуіңізді сұраймыз», – делінген хабарламада.
